حب ف محكمه الاسره 

 كنا نتهينا ف الجزء اللي فات ان مني كسبت الطاعه لعدم توافر شروط منزل الطاعه وان احمد اتحكم عليه بنفقه زوجيه وصغيره .. المهم اتدخل ولاد الحلال عشان يهدوا اللعب بينهم شويه ويحاولوا يرجعوهم لبعض .. وهنا ماننساش دور الاتنين المحامين بتوعهم وقد ايه كانوا حمامه سلام للصلح وعدم الخراب .. وفعلا قدروا يحسنوا العلاقات شويه بين الاتنين وفعلا مني رجعت بيتها بارادتها والحمد لله ولفت الايام وراحت ... لكن تاتي الرياح بما لا تشتهي السفن .. احمد كان راجع من شغله ومني ف البيت بتحضر الاكل .. وكان مش طايق نفسه وهي كمان كانت قرفانه ماهو اصل محمد وايه يهدوا الحيل طول اليوم .. وطبعا دا بجانب ان كل واحد فيهم كان اصلا معبي برضوا من التاني ... كلمه من احمد ع كلمه من مني احمد مسك مني حطها ع القبله وفين يوجعك مسكها عجنها ف بعضها واداها علقه اتروقت فيها ... مني خدت العيال وشمعت الفتله ع القسم ومعاها الجيران .. وهناك عملت لاحمد محضر ضرب وتقرير طبي عنب وطبعا اللي ساعدها ف كده الجيران ولاد التيت .. 

المهم المحضر اتحال نيابه واتحددله جلسه واحمد اترزع ٦ شهور حبس .. مني مش تسكت بقي راحت مكمله ع اللي فاضل بينهم ورفعت دعوي طلاق للضرر .... وهنا يظهر المحامين تاني .. محامي مني طلع ع التسويه وقدم القسيمه وشهاده ميلاد العيال وصور البطايق وصوره من محضر الضرب والحكم .. وعمل اجراءاته وحدد جلسه .. ومحضرش احمد اول جلسه ف اخد اجل لاعاده الاعلان .. ماهو احمد مكنش ملاحق ع الحوارات ... هيلاقيها من حكم ضرب ولا الطلاق ... ف سال المحامي بتاعه اعمل ايه .. المحامي بتاع احمد بصراحه كان موقفه ضعيف ... بس مش اوي لان كل مشكله ف الدنيا ليها ٣ حلول .. المهم المحامي بتاع احمد حضر الجلسه التانيه من الطلاق وطلب اجل للاطلاع وتقديم المستندات والمحامي بتاع مني قدم صوره رسميه من المحضر ومن الحكم وطلب حجز الدعوي للحكم ف القاضي احال الدعوي للتحقيق ..ف نفس الوقت دا احمد كان عمل معارضه وظبط نفسه ف جنحه الضرب واتعدل الحكم من حبس لغرامه.. وجه الشهود ف قصيه الطلاق وكل واحد قال اللي عنده .. ومحاميهم بعد كده طلبوا اعاده الدعوي للرول وهنا بقي كل واحد حضر مذكرته ومحامي احمد قدم الحكم بتاع المعارضه ف الضرب وقدمه مع الجلسه التانيه ف قضيه الطلاق وكل واحد كتب مذكرته وطلع القطط الفاطسه ف شهاده الشهود بس شهود مني كانوا مركزين اوي وهما ف المحكمه .. راح القاضي حجزها للحكم .. واتحكم لمني بالطلاق لوقوع الضرر المحتمل .. احمد كان هايتشل وهو عمال يخسر حاجه ف حاجه ... بس احمد هنا وقف نفقه الزوجيه لان مني خلاص مش ع ذمته وراح ممتنع عن دفع نفقه عياله الصغار ... وراح رافع دعوي رؤيه ع مني ... محامي احمد شمع الفتله ع المحكمه وطلع ع التسويه وقدم القسيمه وشهادات ميلاد العيال محمد وايه والبطايق .. وطلع ع رئيس القلم قدر رسم ودفعه وقيد جلسه ف الجدول واعلن ف محضرين المعادي واتحدد جلسه للرؤيه وطبعا مني عشان تقرفه زي ماقرفها .. ماحضرتش اول جلسه .. راح طالب اجل لاعاده الاعلان ... 

المهم حضرت مني الجلسه اللي بعدها وطلب احمد حجز الدعوي للحكم .. راح القاضي اجل الدعوي لعرض الصلح وتقرير الخبيرين النفسي والاجتماعي ...ولكن للاسف باءت المحاولات بالفشل واتحجزت الدعوي للحكم وكسب احمد قضيه الرؤيه بانه يشوف عياله مره كل يوم جمعه لمده ٤ ساعات ف نادي المعادي .. ماهو اصل مني كانت ساكنه ف المعادي ولازم العيال تتشاف ف اقرب مكان لامهم واحمد كان محدد دا ف العريضه وف طلباته الختاميه .. المهم مني تعمل ايه هوووب راحت رافعه ع احمد دعوي متجمد حبس عن دعوي نفقه صغير ماهو احمد كان بقاله فتره مش بيدفع .. واتكوم عليه مبلغ محترم .. بس مني كانت لئيمه قالت ف الدعوي وهي بترفعها ان احمد مكانش بيصرف بقاله ٧ شهور مع ان احمد امتنع ٤ شهور بس ... المهم مني رفعت الدعوي وقدمت صوره من الحكم وف اول جلسه احمد قال لا انا كنت بصرف وراح مقدم الايصالات اللي كانت مني بتمضي عليها ..احمد كان حويط .. وطلب عمل مقاصه ف فرق النفقه بين المطلوبه والمدفوعه .. واتصفي البلغ ع احمد ٦٠٠٠ ج متجمد ..

 وبقي كل جلسه يجي ومعاه جزء يدفع وياجل للسداد وهكذا لحد ماخلص كل اللي عليه .. مني شغلت عقلها عليه وراحت رافعه ع احمد دعوي زياده مفروض نفقه صغار ... ماهو محمد وايه كبروا وع وش مدارس ومصاريف ... بس ماتنسوش هنا ان مني كانت عامله طلب ولايه تعليميه للقاضي ورفقت معاه ان الولاد ع سن مدارس وحكم الطلاق والقسيمه ولازم تقدملهم ف المدرسه والمهم كان معاها فعلا طلب الولايه التعليميه وجابت شهاده من المدرسه بالمصاريف وقدمت كمان صوره رسميه من الحكم بتاع دعوي الصغير ...

ورفعت الدعوي .. وراحت الجلسات وجت ... واتحكم ع احمد بزياده المفروض من ١٠٠٠ ل ١٥٠٠ بموجب الحكم والتحري عن الدخل ( نفس اللي حصل عادي ف نفقه الزوجيه والصغير ف الاول ) ... واحمد خلاص بقي دايخ وقرفان من وش ام مني ع اللي جابوا مني ... ف حب انه يستانف الحكم ويلعب لعبه التحريات عن الدخل .. بس مني كانت شاطره هي كمان واستأنفت .. عشان تستفاد من قاعده لا يضار الطاعن بطعنه .. يعني قالت لو القاضي مازودش النفقه ع الاقل هايخليها زي ماهي لكن مش هايقللها .. واحمد استانف عشان النفقه تقل او اضعف الايمان تفضل زي ماهي .. وفعلا الاستئناف خلص عن النفقه زي ماهي ١٥٠٠ ج ... طبعا مني حاضنه ماهو العيال لسه ماجابوش سن ال ١٥ .. راحت رافعه ع احمد تمكين .. عملت محضر ف قسم الشرطه التمكين من منزل الزوجيه وراح المحضر للنيابه .. بس مني من تعبها مالحقتش تتابع المحضر وكده كده كان هايتحفظ .. ف عملت طلب تظلم للمحامي العام .. عشان يعيد فتح المحضر تاني .. 

وفعلا بعد ١٥ يوم امر المحامي العام بفتح التحقيق والورق راح الاستيفاء نزل التحريات سال الجيران مني متجوزه مهنا واحمد طردها .. الصراحه الجيران قاموا بالواجب اوي .. المهم بعد التحريات والاوراق اللي اتقدمت قرر المحامي العام بتمكين مني من منزل الزوجيه منفرده اصلها كانت مطلقه .. لكن لو كانت لسه ع ذمه احمد كان القرار طلع مشاركه .. بس احمد كان صايع بقي كان بايع الشقه بتاريخ قديم لامه عشان عامل حسابه لليوم .. بس للاسف احمد كان ضعيف شويه ف المعلومات .. مايعرفش ان قرار التمكين بيتنفذ ع العين مش الاشخاص وان الشقه مهما اتباعت ل ١٠٠شخص ف الاخر بيتنفذ عليها .. ولان قرار التمكين المنفرد بيطلع تمكين مني منزل الزوجيه خالي من الاشخاص والشواغل .. المهم مني دخلت الشقه واتربعت فيها واحمد بقي زي المجاديب بتوع السيده ماشي يكلم نفسه منها .. مني طبعا كانت بتنفذ حكم الرؤيه ع سطر وتسيب سطر احمد ماصدق ان مني وقعت تحت ضرسه راح واخد صوره من دفتر الزيارات اللي ف النادي اللي بيتسجل فيه حركه الزيارات والملاحظات والمثبت فيه ان مني ماجتش بقالها شهر ماهو اصل الحضانه تسقط لو الام مانفذتش الرؤيه ٣ مرات متتاليه وراح عامل محضر اثبات حاله وراح ع المحكمه ورفع دعوي اسقاط الحضانه وتاجيل ف التاني والتالت والشهود والخبيرين اتحكم لاحمد بضم الحضانه لمده ٦ شهور كعقاب لمني ماهو الام لو مانفذتش الرؤيه تسقط عنها الحضانه ٦ شهور ..

 تعمل ايه مني بقي اخر كارت معاها ... فعت علي احمد دعوي استرداد قايمه اعيان ... طلعت ع المحكمه ةرفعت القايمه بالشكل العادي خاااالص لرفع اي دعوي شرعي وبرضوا اجل لاعاده الاعلان واحمد حضر وطعن بالتزوير بنفس الاجراءات اللي اتكلمنها عليها قبل كده بس للاسف احمد فعلا كان ماضي ع القايمه ف راح عامل انذار عرض القايمه وحدد فيه الجلسه والقسم والساعه واليوم اللي هايتعرض فيه العفش كله ويوم التسليم جت مني ومعاها المحامي بتاعها ... وبدات تستلم العفش المهم احمد كان مخلي العفش غالبيته مش نافع ماهو من غيظه .. بس ماكانش يعرف ان جنت ع نفسها مراكش .. مني استلمت اللي استلمته واعترضت ع الباقي وثبتت دا ف محضر اثبات حاله ف القسم بعد ماخلصت .. وطلعت منه صوره رسميه من النيابه ويوم الجلسه قدمت المحضر .. والقاضي احال الدعوي للخبير لاحتساب الهالك من القايمه .. ورجع التقرير وف الجلسه القاضي حكم ع احمد بدفع قيمه العفش الهالك من القايمه .. احمد ماستانفش ومارضيش يكمل وراح دافع الجزء اللي القاضي حكم بيه .. يأس خلاص وتعب